Hukuuma chuubi jodinga junde horremaga ha leddi Najeeriya watau INEC wii do taskiti lorugo duggina chuubi sukkugo burde ha suborde Enugu fombinankere duum tammete doggineego nyande alarba 14 leuru , February ndu en woni nder mum do.
Horeejo yebre finditinol ummatore ema yebre shakkol habaruuji ha office INEC jihakan, Mr Rex Achumie, famtini tefoobe habaruuji duuw be arti be timmini kala taskaram kam fun gam dogginki chuubi din nyande alarba to Allah munyi.
Achumie beddi wiigo hukuuma kan jaban kare chuubi din daga ha bankiru maundu ndu leddindi watau CBN ha gite wakili’en jamdiyaaji siyaasa nastooji chuubi din fu be luttube marbe jude ha chuubi main gam tabitinki adilaaku wadama no handi.
O wii to be jabi kare den be resande on ha fada lamorde hukuuma kan bana misallu jamdi 8 fajira ngam yigo kare den hisi wujjego ko goddum kujeeji kalluduum je wawata feugo ha wakkati chuubi.
A BELLO
