Ngomnaajo Jihawol Niger Abubakar Sani Bello hokki Lamdo jihakan keso sawru laamu mo 7th Sarkin Sudan haa Kontagora, His Royal Highness, Alhaji Muhammad Barau Mu’azu II.
Wakkatiire nden Sani Bello tefri ardiibe laamu ndonndonu wadafodde bawde mabbe dow ko waddata joonde jam haa bakkeeje den musamman nde cubi huusiti haa Lesdi naajeeriya.
Kadima O wi ummaatoore tinndini lamdo on hokkaado sawru kesum do dum goddo goonga giddo joonde jam enanta wadanki ummaatoore kohaandi’e aadilaaku nden huuloowo ALLAH.
Ngomnaajo on wi O woodi tammunde hunnaado on Sarkin Sudan keso jogan amana laamungun ‘e ummaatoore nohaandi.
Nder jawaabu Sarkin Sudan Kontagora, Alhaji Barau Mu’azu II, wi O wadan fodde bawde maako ngam yiiki O hewtani yidannde ummaatoore no haandi nden O tabitinan joonde jam haa bakkeeje den kadi O waddan jahargal yeeso ummaatoore ko sembidinta kilantaaji riskuuji.
Non Sultan mo Sokoto, Muhammad Sa’ad Abubakar III, tawaado haaton numtini hunnaado on keso dow laamu woodi teddeenga doongal sanne O annde kiita nawka do dow maaka to’O waday ko haandi.
Sarkin Sudan danyaama 1974 baaba maako wono Sarkin Sudan Mu’azu Ibrahim
Nder tawaabe haa moobre nden woni Ministaajo yaasi Lesdiiku, Amb. Zubairu Dada, mo luutani ardiido Lesdi Naajeeriya, Sen. Kashim Shetima APC, ballo tumbaljo majaliisaabe, Ahmed Idris Wase, ngomnaajo jihakan boymaajo Muazu Babangida Aliyu, ‘e luttube teddube fuu tawaama haa giifaakan.
SADIQ ALFA
