Ngomnaajo Jihawol Lagos, Mr Babajide Sanwo-Olu hokki siwtaare jee nyalde 3 ngam sanadu masiibo hasaru moota bee laanawal Lesdi ko fe’i haa bakkeeje hakkunde Shogunle enanta Ikeja.
Mootawa ngan roondi Himbe iga Isolo yaa Alausa nden masiibo ngon tawibe dow Datal.
Wakkati ngomnaajo on yaari ngilla haa nyawdorde, LASUTH, Ikeja, ko O tawi Himbe ko hewtani 85 nder woodi ko hewtani 42 nawni sedda sedda nden 29 nowni masin 8 bo nawnande caatude nden 6 sooyi yonki mabbe.
Sanwo-Olu darni golle ngomnati enanta waduki geengal Cubi see baawo nyalde 3 ngam foofuki foofo sooyube yonki mabbe hawtaade bee tefruki Golloobe haa nyawndorde den fuu lorna hakkiilo sanne dow nyawbe ben seete be hebi daama.
SADIQ ALFA
