Ngomnati jiha Borno lori hesditini anniyaaji maga haro wallutuggo kautaal rentoobe ngal Multinational Joint Task Force (MNJTF) ha jiha kan ngam yiigo be kebi sembe honuugo saggarleeku ema tabitinki jonde jam e de’ende ummatoore no footi ha nder gifa man be wendu chadi fu jonde woore.
Ngomnaajo jiha kan Babagana Zulum on hokki tabituuye man ha wakkati nde o jabbino Commandaajo sangere soja’en nde MNJTF, Major General Saidu Tanko Audu, nde yillinomo ha office ru makko wondu Maiduguri bawo nde o yerba jiha kan daga 13 leuru November rowaani.
Ha habaruuwool ngol bolinoowo sangere soja’en nde MNJTF, Lieutenant Colonel Iweha Ikedichi, wurtini ngool tabitini duuw ngomnaajo wanni Major General Audu barka be beddaneego mangu hautaade be yerbeego jiha makko ngam waddangobe jonde jam ema tabitinki de’ende ummatoore jiha Borno no footi. O efti alkawal hokkugo kala bawaal bawo be marata haaje fu.
A BELLO
