Leddi Biritaniya watau United Kingdom manni ngomnaajo jiha Borno, Babagana Umara Zulum, be tinaare duum o wadata hedi honaago saggarleeku ema darango kude rento ha nder jiha makko ngam tabitinki jonde jam e de’ende ummatoore je suptimo.
Ballo timaado leddi Biritaniya ha Najeeriya watau Deputy British High Commissioner, Gill Atkinson,on wadi manoore nden ha wakkati nde o yillino ngomnaajo on ha office ru makko wondu Maiduguri fada lamorde jiha Borno nyande altine do.
Timaddo on beddi wiigo sinanga tinaare ngomnaajo on hedi kude rento da ha jonta jihakan donno habda be keppe saggarle’en, amma laruugo he’are makko kanju on walliti ha waddango jiha kan jonde jam e de’ende, ngammai handi himbe jiha kan bedda hokkugo ngomna Zulum bawal bawo ema kautal hoore.
A BELLO
