Ardungal jamdiyya Labour Party, LP ha leddi Najeeriya beddi wakkati waduugo rigista latago biddo jamdiyya kan yahuugo leuru May waratado ngam heba no himbe dudbe hebira bososel natago jamdiyya kan ngam no be nyamira chuubi garooji.
Seketereejo shakol habaruuji jamdiyya kan mo leddi, Obiora Ifoh, wii duuw horeejo jamdiyya man mo leddi, Julius Abure, hautade be commitiiru holaabe jamdiyya kan fu arti yerdi be beddari wakkati man ngam heba no hkiira ummatoore leddindi bososel waduugo rigista kan be koiduum.
Wakili’en ardungal jamdiyya LP yerdotiri bannin mai ha wakkati nde be ngadiino jonde gidal mangal hakkunde mabbe ha seketeriya jamdiyya kan wonde Abuja nyande alamissa salunde do. Be mbi kala mardo haje hebuugo kati jamdiyya man fu wawan waduugo bakko nyalde be kokki man timma.
A BELLO
