Kampaniwa sakowa nyebbam petroljam maral Dangote sakan dudal palli nyebbam ko dillanta 150,000 kala nyaloma fun gam fesina nyebbam sakadam hakkunde marbe hajje ha leddindi bana no kautal filobe nyebbam petroljam judibe jonde koe mabbe IPMAN andini nyande alat do.
Do mai be godde bolle on wolwa ha gidal ngal duggina hakkunde sorobe nyebbam mai be hukuuma ardungal kampaniwa Dangote. Nden be dido fu be famtotiri no kude den tammi wadego heba wadda jahol yesso ha fiiji nyebbam nder leddindi.
Nder asawere salunde on kautal IPMAN dabbiti jonde famtotiral be kampaniwa Dangote ngam heba be famra duuw hala sankutuggo nyebbam sakadam daga kampanirundun fago jihaji leddindi jonde wore.
Ardiido kautal filobe nyebbam petroljam jodibe jonde koe mabbe IPMAN, Abubakar Maigandi, wii be arti be wadi gidal be wakili’en kampaniru dun nden bo be narri duuw kampani mai hokkan wakili’en mabbe 30 nyebbam sakadam.
A BELLO
